Hemat dan Cermat 3 Juta Rupiah, 18 Hari Traveling, 3 Negara

Assalamu 'alaikum!

Kabar baek ye semuanye?
Di postingan kali ini, mpok mau bagi sedikit cerita tentang pengalaman Solo Traveling mpok yang cuma ngabisin 1000 RM. Itu sekitar Rp. 3.260.000,- (update Oktober 2017). Kebutuhan ini fleksibel tergantung akomodasi apa yang lu butuhin dan berapa banyak orang dalam perjalanan lu.

Si Midun (nama aliasnye Mawar wkwkwkk...) kemaren udah kelar bikin passport. Terus mpok tanya die mau kemane. Die bingung! Malah balik tanya "Traveling Kemana ya?"

Mpok ceritain dikit cuplikannye kaya gini:

Midun: "mpok, gua udah kelar nih bikin passport! Gampang bikinnya yak, mpok! Asal sabar nunggu dan berkasnye semua lengkap. Lamaan nunggu ambil nomor antrian bikin passport mah ketimbang bikin BPJS!"

Mpok: "iyak! Betul. Berapa lama lu nunggu dipanggil imigrasi?"

Midun: "suwe, mpok! (Artinya itu sial) Ada kali yak satu bulanan mah! Kagak ape-ape sih mpok demi traveling. Yang penting semuanye aman terkendali aje. Bener yang mpok kate. Kagak adodallo-caloan apalagi pungli. Gua demen banget mpok!"

Mpok: "alhamdulillah yak, Dun! Mpok seneng banget dah! Terus berape lama lu nunggu kelar passport? Eh, lu ambil e-passport bukan?"

Midun: "iyak! Mpok kan ngomong gitu kemaren. Gua cuma jalanin doank. Takut bala (Oke, haha ini maksudnya juga sial tapi lebih bermakna malapetaka)

Mpok: "cakep dah ahh, Dun! Lu sekarang mau jalan kemane? Udeh dapet tiket belon? Inget beli PP ye! Mpok cuma khawatir aje lu bisa berangkat tapi kagak bisa pulang. Kesian tar emak baba lu."

Midun: "hehehe gua belon tau mau kemane, mpok! Tiket juga belon kebeli."

Mpok: "yaelah! Kalo gitu lu tetep pantengin blog mpok ya! Tar mpok kasi tau Gimana Cara Booking Tiket Pesawat Low Fare tanpa perlu lu nunggu masa promo. Keburu jebot uang lu, Dun! Kagak laku lagi uang lu!"

Midun: "Siap, mpok! 69!"

Mpok: "ape lu kate? 69? 89, pe'a!!! (Maksudnya itu sindiran satire yang maknanya goblog)

Midun: "gua becande aje, mpok! Udah ah mpok lanjut ceritanye."

Mpok: "lu dengerin baek-baek ye! Mpok itu kerja tetap dan sampingan buat dapetin uang bikin passport, beli ticket dan uang jajan selama perjalanan. Tiap bulan mpok sisihin 30 - 40 % dari total pendapatan mpok. Mpok kagak nge-mall. Apalagi nongkrong di kafe atau nonton bioskop. Cuma sekali mpok nge-mall, nongkrong minum kopi di salah satu kafe di Jogja sama nonton bioskop selama 15 bulan mpok kerja.

Contoh, Dun! Lu ade gaji 3 juta yak UMR Jakarta. Mpok di Jogja kudu kerja dari pagi nyampe malem! UMR Jogja kecil banget cuma sejutaan.

Midun: "sadis itu mah, mpok! Becanda banget! Gua mah ogah, mpok!"

Mpok: "nah makanye mpok bilang begini buat nasehatin lu kalo yang gajinye kecil aje bisa kunjungin 3 negara apalagi lu! Semuanye cuma masalah niat aje kejar impian traveling modal backpacker yang demennye gendong tas gemblok kemane-mane."

Midun: "keren! Lanjut, mpok! Kagak sabar nih gua!"

Mpok: "sshhhttt! Nanang, nanang! (Artinya diam, diam). Sebelum lu berangkat ke luar negeri, pastiin lu dapet mata uangnye sono ye! Pengalaman temen mpok, si Umaeroh, nuker rupiah di bandara KLIA (Kuala Lumpur International Airport) eh malah jadi mahal banget. Potongannya banyak. Udah gitu dia ambil pake ATM di Bank CIMB disono. Dudul kan dia yak. Mpok kira dia nuker di Money Changer di bandara.

Selama perjalanan itu, mpok sebenernye bawa uang lebih dari 1000 RM tapi kagak mpok pake. Ternyata malah uang mpok nge-pas banget.

Mpok sisihin uang 200 RM (sekitar Rp. 600.000,-) buat uang jajan di Singapura selama 3 hari 3 malam. Mpok dapet sekitar 65 SGD (1 SGD sama dengan Rp. 10.000,-).

Mpok sisihin uang 150 RM (sekitar Rp. 450.000,-) buat uang jajan di Thailand. Mpok dapet 1200 Baht buat 2 hari 2 malam.

Sisanye mpok make ringgit kemane-mane. Mpok ngabisin banyak perjalanan di Malaysia karna disono same aje kaya di Jakarta harganye buat makan minum doank mah.

Pengalaman mpok kemaren, mpok makan di rumah makan melayu namenye Nasi Kandar dapet nasi, sayur plus ikan goreng cuma kena 5 RM. Lu boleh ambil nasi sama sayur sepuasnye dan kudu makan ditempat. Mpok minum teh tarik kena 2.5 RM. Totalnye Rp. 20.000-an ye? Sama kagak kaya di Jakarta?

Midun: "iyak yak! Same aje mpok."

Mpok: "kalo lu mau ngirit lagi, lu isi ulang botol minum lu di penginapan. Cakep kan? Oh iye mpok juga bingung kenape harga air minum botolan disana lebih mahal. Rata-rata semua harga 2 RM. Mpok diajarin temen mpok orang India katanye kalo nemu mesin yang jual minuman kemasan, beli aja disana. Semua harga minuman cuma 1 RM kaya misalnya susu kedelai, teh manis dalam kaleng. Soda sama kopi susu harga 2 RM.

Nah, hitung kasar ye buat makan doank.

12 hari x 15 RM = 180 RM

Mpok nih sisihin 300 RM buat 12 hari makan disono. 

Total berape, Dun?

Midun: "300 + 150 + 250 = 650 RM mpok. Sekitar Rp. 2.200.000,- ye mpok?"

Mpok: "cakep! Sisa uang mpok 450 RM. Mpok pake buat naik bis, kereta, grab, gantungan kunci, sedekah pengemis, cemilan juga sama de el el."

Midun: "apaan tuh de el el? Merk baju?"

Mpok: "Itu sejenis pecel, Dun!"

Midun: "ohhh... Pecel Malaysia itu ye...?"

Mpok: " hahahahahaha dan lain-lain maksudnya mpok yak!"

Midun: "Bocor alus si mpok mah!"

Mpok: "lahhh... Bagen! (Artinya itu terserah!). Oh iye mpok selama 18 hari itu cuma pake hotel 2 malam di Thailand doank. Sisanya Mpok numpang tidur pake Couchsurfing sama mesjid."

Midun: "ahh iye gua pernah denger itu Couchsurfing, mpok! Ajarin gua pake Couchsurfing juga ye mpok!"

Mpok: "iyak! Biar aman juga lu yak! Selamet!"

Midun: "Angkotnye gimane, mpok? Ade ojek kagak kalo gua lagi buru-buru? Odong-odong yang kaya bocah cilik naikin disono ada kagak? Emak gua sering naikin itu kalo ke pasar (Odong-odong yang dimaksud adalah motor yang bisa menarik kereta berisi 10-14 orang). Katenye murahan itu ketimbang ngojek ame bajai. 

Mpok: "Somplak lu mah! Kagak lah! Odong-odong segala lu sebutin. Wkwkwkwkk! Kagak ade ojek disono. Grab mobil doank. Taksi. Lu orang tajir? (Tajir maksudnya adalah berkantong tebal). Lu naik kereta kemane-mane. Ade MRT sama LRT disono. Murah! Tar mpok ajarin dah gimana cara nikmatin Malaysia Negeri Jiran yang Dirindukan. Soalnye hampir semua pelancong dunia bakal demen disuru balik Malaysia lagi. 

Midun: "Banyak banget ilmu yang lu kasih, mpok! Gua syukur banget. Panjang umur deh lu ye, mpok! Jalan-jalan lagi yak! Biar orang kaya gua bisa nyontek caranye traveling aman, murah dan menyenangkan."

Mpok: "alhamdulillah yak! Makasih berat. Lu tetep pantengin blog mpok yak! Jaga diri lu baek-baek apalagi di 'rumah' orang. Jangan sengak apalagi belagak. Ikutin aturan yang punya 'rumah'."

Mpok lanjutin cerita petualangan mpok di postingan selanjutnya ya! Makasih banyak udah baca blog ini.

Silahkan isi kolom di bawah dengan komentar-komentar positif dan membangun.

Wassalamu 'alaikum!